另一场非国盃16强，马里对赤道畿内亚，以小组首名出线嘅马里，阵中大部分球员效力法甲、英超及德甲球队，今届3战取得2胜1和，无论整体人脚质素及成绩都喺赤道畿内亚之上。事实上，双方近3次对赛，马里获得全胜，主胜值博。

马里曾经系法国殖民地，所以唔少球员前往法甲搵食，包括南特前锋卡利法高列巴利、雷恩後衞咸马利查奥尔等法甲兵。另外，仲有效力德甲劲旅RB莱比锡嘅中场阿马度希达拉，效力英超修咸顿嘅前锋迪赞尼普。不过要数今届非国盃表现最出色嘅马里球员，必定系效力挪超萨普斯堡嘅前锋伊巴谦马干尼，佢喺3场分组赛都取得入球，相信马里有力撕破赤道畿内亚防线。

赤道畿内亚质素低两班

至於赤道畿内亚喺分组赛3战2胜1负，以次名出线，但其实两场胜仗都系小胜1比0，面对实力较强大嘅科特迪瓦即输波收场，可见佢哋遇上非洲一线强队，并无力发围。赤道畿内亚球员主要效力西班牙低级别联赛球队，大赛经验唔及马里，预料系时候行人止步。