今晚深夜西甲，愛斯賓奴主場迎戰貝迪斯。愛斯賓奴主場遇強愈強，近4次主場3勝，今仗隨時帶來驚喜，貝迪斯高踞第3，但近期客場表現麻麻，近5仗作客僅1勝，考慮到雙方都有高質射手坐鎮，攻擊力唔差，而且兩隊近期都旺開3球或以上，2.5球入球大有計。

　　愛斯賓奴現居聯賽第11位，主要靠主場取分，雖然佢哋最近一次主場1比2輸畀艾爾切，但睇番上半季表現，佢哋聯賽主場僅2負，上仗輸波前，主場一度保持7戰6勝1和佳績，包括擊敗榜首皇家馬德里及勁旅皇家蘇斯達，射手魯爾杜馬斯累積11球，包括上仗補時入波2比2逼和卡迪斯，球隊有佢坐鎮攻力有保證，不過球隊防守力一般，連續10仗有失球，近3仗全開3球或以上，旺開入球大。

　　射手當弗有本錢對攻
　　貝迪斯屬前列球隊，今季累積入37球，入球數字僅次皇馬排第2，火力強勁，不過近期作客成績一般，近5仗僅得1勝2和2負，但有4次開3球或以上，首席前鋒桑美佔美利斯累積攻入12球，另一射手保查艾利斯亞斯上仗贏艾拉維斯4比0一仗起孖，腳風甚順，貝迪斯贏唔贏到波好難講，但2.5球入球大就好穩陣。