今晚欧洲区C组大战，意大利作客斗瑞士。意大利上仗失分，虽然追平最长不败纪录，但主帅文仙尼坚不满，佢哋大赛外围赛客场特醒，撞正瑞士队长格列沙加确诊缺阵，有力赢波而回，客胜有计。

　　意大利今夏勇夺欧国杯，点知捧杯后即甩辘，日前世杯外对住弱旅保加利亚，竟然被逼和1比1，虽然令佢哋自2018年起连续不败场数增至35场，追平西班牙及巴西所保持嘅男子国际赛最长不败纪录，不过文仙尼批评球员浪费咗好多机会，就算踢多30分钟都唔会入到波，仲话所失一球，或者可用犯规嚟阻止。佢哋依家喺C组以10分排榜首，但只领先踢少两场嘅瑞士4分，榜首席位未算稳阵。

　　格列沙加确诊缺阵

　　另一边厢，瑞士队长格列沙加日前确诊新冠肺炎，需要隔离而肯定缺阵，「十字军」一向靠佢控制节奏，冇咗呢位中场助阵，连同梳顿沙基利因伤退队，随时变咗盲头乌蝇。何况意大利出战大赛外围赛客场特醒，连世杯外及欧国外在内，近7仗大赛外围赛作客全胜，加上双方喺今夏欧国杯分组赛先交过手，当时意大利大胜3比0，今仗必抢3分巩固榜首地位。