今晚德甲獨腳戲，多蒙特主場火並賀芬咸。多蒙特自開咧戰擊敗法蘭克福後，接連輸波，德超盃不敵拜仁慕尼黑明顯質遜一籌，情有可原，但上仗聯賽輸畀弗賴堡就真係講唔過去，艾寧夏蘭特一旦被箝制，成隊波立即啞火，賀芬咸自然識得點做，今場受讓1/1.5球，下盤捧得過。

　　多蒙特殘陣惡唔出樣

　　多蒙特賣走查頓辛祖後，主要靠艾寧夏蘭特食胡，但呢位挪威前鋒受到轉會傳聞困擾，表現時好時壞，新兵當耶爾馬倫又未能融入球隊，加上「蜜蜂兵團」中後場有多名傷兵，包括杜根夏薩特、曉姆斯、拉菲爾古里路及安利簡恩，影響排陣選擇。

　　賀芬咸今季回勇，頭兩仗聯賽取得1勝1和，一共入咗6球，射手卡拉馬歷雖然未開齋，但轉換咗進攻角色，兩場交出4次助攻，狀態火熱。翻查紀錄，雙方近7次正面交鋒，賀芬咸取得3勝3和僅1敗，絕對唔怕「蜜蜂兵團」，今場受讓1/1.5球，點睇賀芬咸都輸唔到2粒，下盤穩陣到爆。