今晚西甲頭場，基達菲主場硬撼西維爾。基達菲傷停名單一疋布咁長，黑氣未除，西維爾首輪旗開得勝，新兵拉美拿光芒四射，一於捧上盤。

　　基達菲開鑼戰不敵華倫西亞，守將艾歷卡巴高更領紅被逐，今仗要坐波監，另外前鋒達里奧普維達同後衞阿倫尼安亦有傷在身。基達菲上季僅僅護級成功，19場主場贏得6仗之餘，只係入得15粒咁大把，係上季西甲主場入波第2少球隊，就算今仗有地利亦不宜高估。

　　首戰即梅開二度

　　擅於「低買高賣」嘅西維爾，今夏高價將拜仁基爾放畀熱刺，跟住接收呢支北倫敦球隊棄將拉美拿，佢喺首輪對華歷簡奴之役上演「夢幻地標戰」，下半場後備入替即梅開二度，連同射手安尼斯利先開紀錄，最終大勝3比0。呢位阿根廷中場來到西甲只係用半場時間，就以行動征服球迷，今仗相信會正選上陣。翻查紀錄，雙方近4次交手，西維爾全勝之餘更保持不失，擺明格食格，今仗小讓平半上盤穩陣。