欧国盃8强今晚展开，重头大战有比利时对意大利，今场喺中立场德国慕尼黑举行。比利时上场淘汰上届冠军葡萄牙，但亦付出沉重代价，两位进攻主将奇云迪布尼、夏萨特同告受伤，今场上阵成疑，实力受削。至于意大利整体人脚实力平均，加上近4次对比利时取得3胜1负，今场意大利让平半，上盘值博。

　　迪布尼夏萨特或缺阵

　　两队晋级轨迹极之相似，同样喺分组赛3战全胜出线，上场16强赛事都係几经艰辛险胜晋级；但相比之下，比利时遭受嘅打击比较大，因为上场对住硬淨嘅葡萄牙，两位助攻能手奇云迪布尼、夏萨特均告伤出，特别係奇云迪布尼一向係「欧洲红魔」嘅中场大脑，属于胜负关键人物，最佳例子莫过于比利时喺分组赛对丹麦，落后之下全靠佢后备上阵，射入1球并交出1次助攻，比利时先至得以反胜。

　　若然奇云迪布尼缺阵今场大战，势必严重削弱「欧洲红魔」组织攻势嘅能力，即使佢勉强带伤顶硬上，恐怕亦难以发挥出正常水准，前锋卢卡古若然少咗队友输送，想入波肯定冇咁易，今场受让都靠唔住。

　　意大利上场16强大战，最终踢到加时先至击败「奇兵」奥地利，赢得比较惊险，主要原因係领队文仙尼排错阵，以为奥地利「好易食」，因此派出刚伤愈不久嘅中场马高华拉堤担任正选，畀机会佢寓赛于操，顺便收起状态大勇嘅文路尔卢卡迪利，希望佢多啲休息，点知呢个决定导致「蓝衫军」陷入劣势。文仙尼见势色唔对，结果都要作出调整，换入文路尔卢卡迪利之后，意大利重新抢回中场优势，相信文仙尼吸取教训之后，唔会重複犯错。

　　小基艾沙担正增加活力

　　「蓝衫军」防线由门将基安卢基当拿隆马把守最后一关，依然相当稳健，上场后备入替嘅年轻锋将费达历高基艾沙表现出色，今场有望获得正选，相信可以提升意大利嘅活力。睇埋往绩，「蓝衫军」曾于上届欧国盃以2比0击败比利时，加上以佢哋近31场不败强势，有力再挫对手，让球盘意大利小让平半，上盘值得捧场。