欧国盃决赛周前嘅热身赛陆续展开，周三凌晨波兰会喺主场同俄罗斯「拍跳」，两队都係决赛周分子，今场作为热身当然以试阵为主，球员落到场会避重就轻，预料罗拔利云度夫斯基等主力都唔会踢足，今场好大机会以「和」为贵。

　　罗拔仔怕伤只踢半场
　　波兰已经决选26人大军名单，王牌射手罗拔利云度夫斯基自然成为焦点，佢喺4月初曾经受到膝伤困扰，好彩伤愈后喺拜仁慕尼黑最后4场赛事都有上阵，状态得以保持，但为免决赛周前再出问题，赛前消息指佢可能只会踢半场。波兰领队保罗苏沙年初先至上任，3场世盃外只有1胜1和1负，仍然处于试阵阶段，今次主场出击亦赢面唔高。

　　作客嘅俄罗斯目前选出30人大军，领队查切索夫仲要剔走多4个球员，今场好大可能係畀边缘球员争取入选最后机会，多位年轻球员有望披甲，试阵嘅用意就更加明显。波兰同俄罗斯对上两次交锋都係打和，可见两队势均力敌，相信今场再开和波机会甚高。