今晚有韓職賽事上演，FC水原會喺主場迎戰仁川聯。今季新昇班嘅FC水原目前排第8位，演出比預期中理想，最大原因係南非箭頭韋迪維積克狀態大勇；至於仁川聯自從王牌球星史提芬穆高沙復出後，入球能力同成績都大有改善，今場兩大神鋒對決，預計會有唔少入波，中位數2.5球大盤值得支持。

　　FC水原今季最大亮點係進攻流暢，韋迪維積克同好拍擋梅里路漢歷基肩負起球隊入球重擔，FC水原喺呢兩位曾效力全北汽車嘅球星帶動下，入球能力提昇，上場對浦項制鐵一度喺落後3球之下，曾經一口氣連追3球，雖然最後都要輸3比4，但係表現已經贏得球迷一致好評。韋迪維積克近6場賽事有5場能夠攻破對手大門，成為入球保證，今次主場出擊肯定加多兩錢肉緊。

　　史提芬穆高沙上場開齋
　　仁川聯開季成績極差，當中致命打擊係王牌前鋒史提芬穆高沙確診新冠肺炎，以至要隔離休養長時間缺陣。但自從呢位黑山前鋒4月底復出後，球隊表現即時脫胎換骨。仁川聯目前有16個聯賽入球，當中7球係史提芬穆高沙復出後嘅5場比賽中取得，呢位前鋒亦喺上仗對FC光州開齋，信心返曬嚟。再者，仁川聯作客向來以攻代守，近7場聯賽作客有6場總入球開3球或以上，今場兩大射手同時較技，入球大最抵玩。