今晚英超头场列斯联主场斗热刺。列斯联一改以往有前冇后嘅风格，尤其主场出击会稳阵行先，热刺虽争前4，但同「狂人主帅」比尔沙相比，看守领队赖恩美臣始终未够火喉，预计会小心行事，一于捧2.5球入球细。

　　列斯联喺比尔沙领军下，季初刮起一股进攻风暴，打到利物浦及曼城等强队气都咳。但随住拎够分上岸，加上箭头班福特脚风唔及季初咁顺，改变踢法加强防守。特别係主场出击，近5仗主场只入3球而仅失3粒，有4次开2球或以下，包括同车路士及曼联互交白卷，以及斗利物浦各一言和，比尔沙果然薑愈老愈辣。

　　赖恩美臣冇经验唔敢乱攻
另一边厢，临危受命嘅29岁热刺教头赖恩美臣仲学紧嘢，虽然英联盃决赛输波，但联赛两连胜，争前4未绝望，不过胜仗都係来自主场，对手只属修咸顿同已降班嘅锡菲联，不宜高估。而且碍于列斯联嘅疯狂逼抢，热刺亦唔敢轻举妄动，宁捧入球细。