西甲争标形势坚紧凑，马德里体育会、巴塞隆拿、皇家马德里及西维尔都有捧盃机会，其中皇马今晚尾场于主场迎战奥沙辛拿。「银河舰队」老将偏多，连场激战未回气，而且主帅施丹讲明欧联大过天，今仗随时留力，奥沙客场出击例耍太极，劲旺半场和，不妨追多铺。

　　皇马周中喺欧联4强首回合以1比1赛和车路士，下周又要作客应付次回合，虽然早前受伤嘅丹尼尔卡华积、夏萨特及沙治奥拉莫斯已好番，但几名主力如宾施马、却奥斯及莫迪历年纪偏大，难喺短时间内回到气，无可避免需要轮换。皇马近期联赛先后畀基达菲、贝迪斯闷和0比0，可见频密赛程下，被逼轮换会影响发挥。再者「银河舰队」喺欧联畀车仔攞到作客入球，形势被动，主帅施丹讲明要以最佳人脚及状态出战次回合，明显欧联大过天，今仗战意成疑。

　　奥沙辛拿作客劲旺半和
　　奥沙依家排联赛榜第11位，既冇降班威胁，争踢欧洲赛机会亦唔大，不过佢哋近况唔错，连盃赛在内，近7场作客法定时间取得3胜2和2负，如单计上半场更只失1粒，6次与对手半场互交白卷，今仗初段守得住兵疲嘅皇马，半场和好路。