罗拔仔退队波兰有难

世界盃外围赛欧洲区I组瞩目大战，英格兰主场对波兰。「神箭」罗拔利云度夫斯基受伤退队，对波兰影响之大真係计数机都计唔掂，预计英格兰可以尽情抢攻。事实上，「三狮兵团」以往对住波兰都好抢缰，近9次交手有7次半场领先，踢法格食格，今场一于捧英格兰半场主胜。

罗拔利云度夫斯基踏入2021年，各项赛事上阵20场攻入25球；近两场世界盃外围赛入咗3粒，累积入咗24球，喺欧洲球员之中仅次于30球嘅C朗，以及26球嘅舒夫真高，佢同时係波兰史上「士哥王」，为国家队射入66球，绝对係波兰成败嘅关键人物。

之前为咗令「罗拔仔」可以喺今场比赛上阵，惊动到波兰总理莫拉维茨基，亲自打电话畀德国总理默克尔，最终开绿灯通融「罗拔仔」嘅检疫手续，容许佢由英国返回德国后，毋须隔离14日，先至令佢嘅所属球会、德甲班霸拜仁慕尼黑放人。搞场咁嘅大龙凤，就知波兰上下都明白，呢场波冇咗「罗拔仔」对争取出线实在非常不利，依家呢位箭头受伤退队，大军仲受到疫情困扰，今仗可以话未踢先输一半。

速战速决乘机抖抖

「三狮兵团」愈踢愈顺，佢哋先以半力出击轻取圣马力诺5比0，上场就有哈利卡尼1传1射，以2比0作客击败阿尔巴利亚，预料今仗主场出击，可以击败冇咗「罗拔仔」嘅波兰。其实英格兰近7次主场斗波兰录得全胜，不过主Ｗ太热冇肉食；翻查纪录，原来英军近9次斗波兰，有7次半场已经领先，一于信佢哋再一次早早搞掂波兰，等领队修夫基可以早啲畀班英超球星抖吓，同各大球会有交代，推介半场主胜。