今晚欧霸32强次回合，曼联返主场再斗皇家苏斯达。「红魔」于首回合大胜4比0，嚟紧联赛又要硬撼车路士，今仗留力唔奇，轮换派遣格连活特、丹尼尔占士等生牯仔一样照攻，加上佢哋每逢出战欧洲赛都入得又失得，面对皇苏随时再演入球*，2.5球嘅大盘最好路。

　　曼联首回合于中立场大炒皇苏4比0，令人喜出望外，毕竟皇苏係西甲前列分子，冇谂过会赢得咁轻鬆。「红魔」仍有保罗普巴、麦汤米尼同卡云尼等伤兵，般奴费南迪斯、拉舒福特纵然继续有货交，但征战连场铁人都会攰，何况嚟紧联赛要作客「车仔」，既然喺欧霸已遥遥领先，主帅苏斯克查随时收起主力，养精蓄锐鍊「车」。

　　不过曼联一众生牯仔同样有料到，其中早前一度失宠嘅格连活特与丹尼尔占士，近期亦多咗上阵机会，后者近两仗攻入两粒并交出助攻，表现醒神，而18岁新星阿密特迪亚路，喺对皇苏嘅首回合末段入替，其盘扭能力亦非常抢镜，难得上阵一定搏甩髀。睇番「红魔」出战欧联例进取，欧联连欧霸在内，今季7场欧洲赛入19粒，但场场都有失波，全开3球或以上，正宗有前冇后。

　　皇家苏斯达冇包袱斗攻
　　皇苏虽然首回合意外大败，但佢哋有回勇迹象，近4仗取得3胜1负，狂轰9粒，其中3场开3球或以上，前锋阿历山大伊沙克更佔咗6粒，脚风转顺。儘管皇苏收复失地机会不大，但预计佢哋都想踢番场争气波，冇心理包袱下实斗攻，今仗捧入球大更上算。