今晚英超尾场，联赛及盃赛3线作战嘅曼联主场迎战纽卡素。「红魔鬼」征战频频，今场已经係佢哋16日内第5场比赛，球员体力肯定有影响；现时排下游嘅纽卡素自知实力有限，作客只会以「铁桶阵」应对，佢哋连盃赛在内，近8场作客法定时间内全开3球或以下，中位数3.5球细盘好路。

　　英超球季受到疫情影响，迟开之馀，又要迁就欧国盃提早完结，所以赛程逼到癫，要出战欧洲赛同本土盃赛嘅豪门，真係想抖吓都唔得。曼联要喺英超、足总盃同欧霸3线作战，近16日踢5场，早前英足盃对韦斯咸激战120分钟，先至喺加时赢波，之后联赛对西布朗亦见部分球员力不从心，今场斗纽卡素之前，又同皇家苏斯达喺欧霸32强首回合大战，体力需求甚大。

　　「红魔鬼」多名正选球员如拉舒福特同哈利马古尼等连续踢足几场，中场发电机般奴费南迪斯即使部分赛事只任后备，亦场场有份上阵，今场斗弱旅纽卡素，相信会见好就收，主帅苏斯克查甚至会畀小将踢吓都唔出奇。

　　喜鹊作客一味靠守

　　未计周六赛事，纽卡素距离降班区有6分距离，作客当然唔会大贪，以1分为目标。事实上佢哋好有自知之明，不论联赛抑或盃赛，都係踢死守战术，「喜鹊」近8场作客赛事，法定时间全开3球或以下，对手仲包括车路士、阿仙奴及曼城等多支Big 6球队，曼联征战频频，今场即使赢波亦未必会大炒，3.5球入球细稳阵。