今晚欧霸32强首回合，阿仙奴于中立场意大利嘅罗马火併宾菲加。阿仙奴今届欧霸6战全胜兼火力全开，依家仲加入新核心马田奥迪加特，攻力进一步提升，不过宾菲加亦非善男信女，碧斯于欧霸更频有士哥，斗攻格局必捧入球大。

　　奥迪加特来投生勐晒
　　阿仙奴于欧霸B组分组赛多用副选同小将担大旗，效果奇佳，6战赢晒狂轰20粒，全开3球或以上，伊美路维同柏保路马尼藉住欧霸嘅出色表现，依家仲「升呢」喺联赛获重用，一度被标籤为「水货」嘅尼高拉斯比比，喺今届欧霸已入3粒及有3次助攻，绝对係畀边缘人博上位嘅最佳场合。当然嚟到淘汰赛，主帅阿迪达未必再大胆用小将，不过冬窗从皇马借入嘅天才中场马田奥迪加特，上仗拍住伊美路维同布卡约沙卡，成功激活进攻，协助队长奥巴美扬戴帽以4比2击败列斯联，唔好忘记仲有拿卡锡迪同加比尔马天尼利，令阿迪达中前场大把人拣，考虑到下仗联赛要硬撼曼城，今仗或者收起奥巴美扬，但进攻影响不大。

　　另一边厢，宾菲加近6仗联赛仅1胜，于葡超已跌落第4位，更想喺欧霸盃发围，佢哋喺D组分组赛6战取得3胜3和，比格拉斯哥流浪少2分以次名出线，呢班波进攻大过天，呢6场狂轰18粒，全开3球或以上，火力仅次于利华古逊同阿仙奴。其中最抢镜嘅梗係碧斯，呢位进攻中场于今届欧霸已有6球进帐，与里尔嘅耶斯斯并列射手榜榜首，脚风奇顺，而且今仗係「挂名」主场，必定搏尽抢先机，既然大家都咁攻得，捧大盘最上算。