现时联赛失分最少嘅曼城，今晚主场斗阿士东维拉。曼城虽然冇咗早两季嘅霸气，但低调咁慢慢上番次席，稳健后防配合一剑封喉嘅攻势，令到「蓝月亮」联赛5连胜，而且佢哋入局极快，呢5场全部半场领先，相信今仗半场足够KO维拉。

经过上半季频频失分后，曼城领队哥迪奥拿改用稳住中后场嘅战术，再向对手施以突袭，收到「一剑封喉」嘅良好效果。曼城球员平均质素始终较高，经过调整战术同心态，表现慢慢稳定落嚟，呢啲亦係争联赛斗大长途嘅重要元素。

维拉球员状态成疑

藉住上轮4比0大炒水晶宫，「蓝月亮」升上联赛榜次席，只比榜首曼联少2分仲少赛1场。哥迪奥拿今季重点栽培嘅菲尔科顿亦孭起入球重任，喺对白礼顿同车路士两仗都有士哥，近几场仲多咗位奇兵，就係德国中场根度简，佢最近4场联赛入3粒，加上史达宁同费伦托利斯等，曼城火力仍然可信。

维拉受疫情影响，自1月2日后冇踢过联赛，即使中间踢过一场英足盃，亦只係派遣青年军落场，阵中球员康复程度令人怀疑，即使能够派遣主力上阵，但状态肯定大不如前。既然曼城近5场联赛全胜，全部半场领先，今场可照办煮碗。