今晚另一场英联盃8强赛事，近况下滑嘅热刺作客英冠球队史笃城。热刺上轮联赛主场0比2输畀李斯特城，已经被榜首利物浦抛离，为求尽快重振雄风，「史笃城剋星」哈利卡尼等主力随时落场，以热刺嘅实力加上决心，让一球／球半照捧上盘。（周四凌晨1时30分开赛）

　　哈利卡尼专剋史笃城

　　热刺近年已跻身英超顶尖劲旅行列，不过球队对上一个奖盃，已经要数到2008年嘅英联盃冠军。热刺聘请夺冠无数嘅摩连奴取代普捷天奴执教，就係希望可以打破多年锦标荒。虽然热刺喺英超同欧霸赛事都有机会争冠，但英联盃已经杀入8强，今圈对手亦只属英冠球队，距离冠军得3场之遥，当然唔会错过大好机会。

　　热刺今季增兵后人脚相当充裕，强如加里夫巴利同葡超金靴卡路士云尼斯奥斯都成为「盃赛专员」，而且摩连奴甚少进行彻底轮换，哈利卡尼今季就曾经喺7场盃赛披甲，包括上圈英联盃对车路士后备上阵。「哈神」过去5次对史笃城入咗9球，加上热刺近5次对赛录得全胜，当中4次淨胜2球或以上，今场可谓不胜无归。

　　史笃城依家喺英冠争紧升班资格，不过佢哋近况麻麻，近4场主场只係两胜两负，唔算突出，想藉地利同热刺抗衡都唔得，睇怕要大败一仗。