东京心繫亚冠Hea踢联赛

　　今晚日职上演好戏码，联赛第4位嘅名古屋鲸鱼主场迎战3哥FC东京。鲸鱼今季喺地头出击特别有心得，主场成绩仅次于「准冠军」川崎前锋；东京为准备月尾嘅亚冠盃近期频开快车，联赛早已无心恋战，鲸鱼有望打破近期畀对手食住嘅宿命，主胜值得捧场。

　　日职喺疫情下仍然容许观众入场，当中鲸鱼特别注重主场比赛，每次主场都喺官网大事宣传，球员亦争气打高一皮波，今季12次主场出击，录得9胜1和2负嘅联赛第2佳成绩，仅次于榜首川崎前锋，9场胜仗中包括1比0击败前锋，威力唔讲得笑。

　　由于今季日职赛程频密，鲸鱼对作客赛事近乎放弃，呢个情况由9月至今特别明显，不过仍有主力顶唔顺，今季联赛射入6球嘅金崎梦生，就因右膝十字韧带及外侧半月板受伤收咧，不过佢哋仲有马迪奥斯杜斯山度士呢位首席射手压阵，影响未致于好大。

　　东京近7仗联赛5败

　　FC东京自从取得日联盃决赛资格后，近7仗联赛输咗5场，虽然日联盃决赛因对手柏雷素尔出现感染群组而延期，但佢哋仲要为本月底重开嘅亚冠盃做准备，相信今仗继续「交行货」唔慌搏命。

　　翻查往绩，东京近6次对赛全胜，包括今届日联盃大炒鲸鱼3蛋，表面上食住对手，但佢哋近两场联赛作客都输波，尤其前仗1球不敌下游分子FC横滨令人失望，今场一于捧主队打破宿命，赢番东京1次。