新丁挂帅斗威尔斯
　　今轮国际赛期有场英伦打吡，英格兰喺温布莱球场约战威尔斯拍跳！由于双方嚟紧仲有2场欧国联要应付，预计今场唔会太着紧胜负，英军主帅修夫基最锺意提携新人，预计今场会有多张新面孔出现。英格兰虽然一直食住威尔斯，但好少会大炒，估计今场入波都係一球起，两球止。（周五凌晨3时开赛）

　　英格兰「派对3宝」谭美阿巴谦、查顿辛祖同芝维尔违反禁聚令，被英格兰足总勒令延迟报到，唔可以同国家队其他成员接触，意味住呢场热身赛肯定唔使预佢哋。不过，一向锺意提拔新人嘅修夫基，唔怕冇球员可用，多名青年球员喺英超头几场都有好抢镜表现，亦已经入选大军名单当中。

　　爱华顿前锋卡维特利云现时以6球，同孙兴民并列英超射手榜，佢同阿仙奴新星布卡约沙卡以及李斯特城中场哈维班尼斯都係首度入选，英国传媒预计，3人好大机会正选上阵。加埋列斯联中场加云菲腊斯会做3人防线前嘅屏障，门将亦会放弃近期频频「派胶」嘅碧克福特，畀般尼嘅尼克普比担正，变动咁大，默契有待建立。

　　威尔斯巴利蓝斯冇入选
　　至于威尔斯亦有2名大将缺阵，加里夫巴利未好番冇入选，艾朗蓝斯因为祖云达斯有职员中招，要进行隔离唔可以报到，领队杰斯要靠班后生孭起条中场线。哈利威尔逊同丹尼尔占士具备质素，活力够晒但国际赛阅历不足，同「三狮兵团」一班生牯仔都係经验唔够，往绩上英军虽然远胜「红龙」，近6对碰获5胜1和，但当中4场只係小胜1粒，让球主胜风险大，既然呢6场有5次开2球或以下，改捧入球细更加明智。