英超爭四向來好睇過戲，嚟緊禮拜四凌晨就會有一場事關前四嘅關鍵戰役，夢劇場主人曼聯將迎戰今季冒起嘅錫菲聯。

　　復賽後唔開心嘅球隊有唔少，錫菲聯絕對會係其中一個。喺英超停擺前，佢哋一度7輪聯賽搶足14分(4勝2和1負)，但賽季重啟之後嘅兩輪聯賽，錫菲聯和負各1場並且均交白卷。與此同時，今季防守威力震懾英超嘅錫菲聯喺上輪聯賽更加輸波又輸人，慘吞紐卡素三蛋之余，中堅約翰艾根更加染紅離場，從睇到殺入聯賽前四嘅希望，到如今復賽後連續失分，錫菲聯將士嘅心態顯然出現咗問題。

　　而對於曼聯嚟講，佢哋嘅開心時刻應該要從中場大將般奴費南迪斯加盟開始計起。喺冬季成「魔」之後嘅6場聯賽中，呢位葡萄牙球星不僅帶領曼聯保持不敗(勝和各3場)，而且佢個人期間亦貢獻3波同3次助攻，漸露夢劇場新一代摣Fit人嘅潛質。另外仲有一個好消息就係法國中場普巴嘅及時「甦醒」，喺上輪對陣熱刺嘅比賽中，喺下半場後備上陣嘅普巴發揮亮眼，只要佢能夠繼續生生性性，曼聯嘅勝算自然更大。

　　喺人腳方面，曼聯只有兩個後衛連迪路夫和菲爾鍾斯因傷避戰；而錫菲聯今仗就麻煩得多，除咗約翰艾根要坐波監之外，正選門將D.亨達臣又因為回避條款是役只能夠做觀眾。

　　值得留意嘅係，錫菲聯聯賽至今只有2場失波達到3波，上輪對陣紐卡素係一次，另外一次就係首循環對陣曼聯。