隨住美洲盃、女子世界盃及金盃三大賽曲終人散，話咁快新一季歐聯又正式展開；今晚上演多場第1圈外圍賽，蘇超班霸些路迪首回合作客波斯尼亞球隊薩拉熱窩。屈指一算，薩拉熱窩對上一次出戰歐聯外圍賽已經係2015年，大賽經驗遠遜對手，些路迪客勝可作為過關重心。

　　波斯尼亞近年質素較好嘅球員早向外闖，故此國內聯賽水平唔高，參戰歐聯通常只係陪跑分子，包括今場主角薩拉熱窩，佢哋最近1次出戰歐聯外圍賽都係「一輪游」，喺當年第2圈外圍賽兩回合計以總比數0比3輸畀波蘭球隊列治普斯納，主、客兩回合都冇入波。相反些路迪近年已慣常出戰歐聯外圍賽，提早開操更加係家常便飯，狀態同實力絕對信得過，今場作客一樣有力旗開得勝。