聽朝美洲國家盃獨腳戲，C組烏拉圭迎戰日本。烏拉圭今屆有兩大神鋒蘇亞雷斯同卡雲尼沖鋒陷陣，加上盧迪路後上支援，首戰就火力全開大捷而回，面對後防未算硬淨嘅日本，要入波唔難；日本首輪大敗今仗冇得縮，加上兩軍近年對碰旺大手交易，中位數2.5球大盤好路。

　　烏拉圭首戰盡顯霸氣，面對實力分子厄瓜多爾，都能取得完美開局。開波早段中場盧迪路個人表演先開紀錄，之後趁住對手打少一人下攻勢更係水銀瀉地，卡雲尼凌空「車身倒掛」射入世界波，加埋拍檔蘇亞雷斯都有斬獲，兩大箭頭齊齊開齋，一條鋒線磨到利曬，睇得出烏拉圭全隊上下都充滿決心，係為咗冠軍而嚟，面對任何防線都有入波本錢。

　　日本久保建英首戰搶鏡

　　「藍武士」日本今次點兵明顯為明年奧運作准備，以年輕球員為主，經驗欠奉成為一大弊病，上仗對住智利就慘吞4蛋，落筆打三更，後防面對南美勁旅明顯招架唔嚟。可幸進攻其實唔曳，多次威脅對手後防，入唔到波只係欠運，其中剛轉投皇家馬德里嘅超新星久保建英，表現極為搶鏡，經過首場適應後，相信會有更佳發揮。況且雙方近4次交手，有3次開3球或以上，今仗兩隊勢演對攻戰，中位數2.5球大盤唔好錯過。