幾經辛苦，喺英超鎖定「前4」嘅車路士，今晚歐霸4強次回合返主場迎戰法蘭克福。車仔既然已穩袋下屆歐聯入場券，大可專心爭奪歐霸錦標，心理壓力減輕咗唔少，相信會有更好發揮。要知道車仔今屆歐霸征程，甚少派遣王牌夏薩特，依然殺入4強階段，愈後愈重要嘅賽事，「夏神」已經加入戰團，必定如虎添翼。

　　法蘭克福焗攻易出事

　　作為德甲喺今屆歐洲賽嘅「幸存者」，法蘭克福表現唔失禮，尤其佢哋進攻大過天，踢法悅目，不過防線認真唔穩陣，啱啱喺聯賽就畀利華古遜大炒6比1，就算有留力之嫌，亦驚佢哋輸到影響信心，加上首回合喺主場和1比1，今仗冇得坐以待斃一定要爭取入球，焗攻下更有利車仔打反擊。今仗讓球盤車仔要讓1/1.5球，睇落幾辣，但唔係冇道理，上盤值得捧場。