联赛5连败嘅韦斯咸，作客列斯联爆发护级大战！列斯联啱啱闷和纽卡素，但佢哋近5次对伦敦球队输晒，心理上难免较输蚀，两军都冇赢波嘅把握，唔输对大家嚟讲都系好结果，预料双方半场都会踢得较谨慎，谋定而後动，今场一於捧半场和。

　　欧协联杀入淘汰赛嘅韦斯咸，喺英超情况啱啱相反，17战4胜2和11负，快车尾轮前排尾4，仅以得失球差压过尾3嘅诺定咸森林。「锤仔帮」由10月尾开始，接连输畀曼联、水晶宫、李斯特城、阿仙奴同宾福特，领队莫耶斯更成为下任被炒大热，今场再输真系好大镬。

　　主场嘅列斯联经过几场大开大合嘅赛事後，上场作客成功闷和纽卡素，能够拎走1分绝对系大成就，佢哋暂时领先韦斯咸两分排14位，护级压力同样大。最大镬嘅系，今季佢哋面对伦敦球队成绩差到爆，5场联赛输晒，今场未必敢轻举妄动，既然两军都怕输，预计踢法都系偏向防守性，半场和系最佳选择。