德甲班霸拜仁慕尼黑主場斗史特加。拜仁喺歐聯分組賽旗開得勝，今場當然要乘勝追擊，贏波追趕榜首，但值得留意嘅係，拜仁下周中要惡斗巴塞隆拿，今場以3分為目標就夠，唔需要大炒，拜仁近4戰有3場開2球或以下，呢場入球大細中位數開4.5球，大把位走盞，玩入球細好過。

　　買波最忌錯估形勢，唔少球迷見到拜仁斗下游球隊，就自然覺得一定大炒，玩入球大、半場大或者上盤好穩陣。其實拜仁喺德甲超曬班，講真，場波佢想點開就點開，最緊要只係3分，1比0又係3分，9比0都係3分，做咩要同你嘥力。

　　下周歐聯要惡斗巴塞

　　拜仁最大目標始終係歐聯冠軍，下個星期仲要斗巴塞隆拿，陣中有佢哋眼中嘅「反骨仔」羅拔利雲度夫斯基，呢個歐聯對碰嘅兩場主客賽事，係拜仁上半季重中之重，所以今場斗史特加，肯定會留力。

　　史特加今季4和1負仲未開齋，對住拜仁當然唔會不自量力斗攻，事實上史特加主要係靠防守搶分，失球數字唔高，聯賽5場有4場開2球或以下，碰啱拜仁教練拿高斯文對隊波都係錫住用，近4場有3場開2球或以下，今場相信只會小勝，推介4.5球入球細。