世杯外附加赛瞩目大战，亚洲区代表澳洲将于中立场卡塔尔决战南美洲劲旅秘鲁，牌面上秘鲁或高出半线，不过佢哋踢法向来守强攻弱，而被睇低嘅澳洲亦会屯重兵防守，务求稳住阵脚再伺机反击。今仗中立场踢嘅系一场过生死战，双方都唔想有任何闪失，上半场多数睇定嚟踢，博半场和好路。

　　比赛喺卡塔尔上演，澳洲上星期就喺呢个球场以2比1险胜阿联酋，拎到踢呢场决战嘅资格，适应上或者会有优势。澳洲球员平均质素唔高，加上前锋阿当泰加特仍受伤员困扰上阵成疑，入球能力受到削弱，今仗好大机会先踢稳阵波，尤其佢哋嘅球员平均年龄较轻，留前斗后喺下半场搏杀或有更佳效果。事实上，澳洲近4仗半场全部打和，上半场要击败佢哋唔系易事。

　　秘鲁入球能力偏低

　　秘鲁喺南美洲区力压哥伦比亚同智利，排第5名拎到附加赛资格，佢哋自从比沙路、荷西古里路等传奇前锋退役后，前线一直未有球星孭飞，今届外围赛只入19球，入球数排南美洲区尾3，突围全靠一条可靠防线。秘鲁上星期热身赛对新西兰，亦喺老鼠拉龟下凭下半场1个入波小胜1比0，今仗面对实力更强嘅澳洲，入波难度有增无减，半场闷和机会极高。