今晚英超尾场大战，利物浦主场硬撼热刺。「红军」目前落後榜首曼城1分，预计要赢晒最後4仗先有望封王，主场出击必冇保留；热刺亦急需3分向第4位嘅阿仙奴施压，不过佢哋稳定性始终唔及「红军」，加上利物浦主场恶气十足，让1/1.5球照捧上盘。

　　利物浦同曼城近年斗到着晒火，互相迫使对方踢出最高水平，两大劲旅已化身「赢波机器」，利物浦近14场联赛豪取13胜，唯一赢唔到就系打和曼城，等闲球队遇着佢哋真系冇运行。「红军」喺晏菲路霸气更盛，联赛主场已经12连胜，当中10场录得零失球，10场赢对手2球或以上。

　　利物浦周中喺欧联有惊无险杀入决赛，球员士气高昂，依家可以集中火力喺联赛争霸，穆罕默德沙拿、沙迪奥文尼及路尔斯戴亚斯等前锋轮流发威，锋力足以摧毁任何防线。加上佢哋近8次对热刺，录得7胜1和佳绩，明显「格食格」，心理上占尽优势。

　　热刺演出飘忽

　　热刺现时落後阿仙奴2分排第5位，要争入前4不容有失，可惜佢哋近期演出飘忽，上轮击败留力嘅李斯特城前，先後喺白礼顿同宾福特身上失分，哈利卡尼同孙兴民面对紧密防线威力大减，造访晏菲路难有作为，利物浦让1/1.5球，上盘信得过。