数字上仍系英超前4争逐失分最少嘅阿仙奴，周六主场迎战白礼顿不容有失。「兵工厂」上仗意外吞水晶宫3蛋，今仗返主场肯定会奋力反扑，佢哋喺酋长球场向来「欺善怕恶」，面对实力较弱球队绝少甩拖，白礼顿到访肯定凶多吉少，主胜定过抬油。

　　阿仙奴上场作客以0比3不敌水晶宫，并因得失球差唔及多踢1场嘅热刺，跌落第5位，对於争入前4参加下届欧联造成打击，余下联赛每仗都会当成决赛咁踢。事实上「兵工厂」季尾状态唔错，就算上仗输波，近8场联赛都有6胜，而且今季主场表现「正气」，除输畀曼城、利物浦、车路士3强之外，其余12场联赛主场对住较弱球队，获10胜2和佳绩，白礼顿实力一般，难喺酋长球场作恶。

　　白礼顿季初成绩理想，中游位置已经非常稳阵，既不愁降班亦难抢欧战席位，所以球队近期战意明显不足，近7场联赛仅得1和6负，对上6场更有5仗交白卷，首席射手马奥比已接近2个月冇入波，白礼顿态沉兼士无斗志，难阻阿仙奴全取3分。