今晚西甲上演独脚戏，榜首皇家马德里作客小岛球会马略卡。「银河舰队」上周中喺欧联反胜强敌巴黎圣日耳门，晋级8强，球队上下士气高昂，加上老将宾施马及莫迪历弗到漏油，撞正4连败嘅马略卡，赢波绝对冇难度，客胜有计。

　　皇马喺上周中欧联16强次回合迎战法甲班霸巴黎圣日耳门，於上半场失守令两回合计落後0比2，陷入劣势，呢个时候法国箭头宾施马大发神威，个人连中三元，带领「银河舰队」奇迹反胜，杀入8强。

　　连同呢3球，宾施马以34岁零80日之龄，成为欧联史上最老「戴帽」球员，佢喺皇马亦累入309球，超越已故名宿迪史堤芬奴，升上皇马历史射手榜第3位，而比佢更老嘅中场莫迪历全场奔跑兼交出助攻，同样老而弥坚，配合云尼斯奥斯祖利亚等新仔，主帅安察洛堤呢套「以老带新」方针，令皇马今季有平稳演出，依家喺联赛榜领先，遇弱自然唔会留手，实行全取3分巩固榜首优势。

　　马略卡小岛威力冇晒

　　主队马略卡近况低迷，仍然喺下游挣扎，佢哋联赛已经4连败，其中两仗系主场，以往嘅小岛威力唔见晒，依家同降班区愈来愈近。加上两军近8次交手，皇马录得7胜1负压倒性优势，乘勇有力赢波而回。