今晚另一场欧霸16强焦点赛，西维尔主场硬撼「锤仔帮」韦斯咸。西维尔贵为「欧霸之王」，今次重返最熟悉嘅战场，信心十足，遇上刚恶战未回气嘅韦斯咸，可藉地利抢先机，主胜必捧。

　　西甲「二哥」西维尔喺今届欧联分组赛G组6战仅1胜，排名第3无缘晋级，因而转战欧霸，附加赛淘汰萨格勒布戴拿模入16强。西维尔最擅打呢项赛事，连同前身欧洲足协杯在内，西维尔曾6次封王，属于欧霸史上夺冠次数最多球队，过去8届就曾4次捧杯，「欧霸之王」并非浪得虚名。

　　韦斯咸主力踢到残

　　今次系韦斯咸事隔5年再战欧洲赛，虽然喺欧霸分组赛H组以首名出线，但对手只属维也纳迅速、亨克等二流球队，好难与经验丰富嘅西维尔相提并论。而且「锤仔帮」板櫈深度唔够，主帅莫耶斯用嚟用去都系主力球员，轮换不足，搞到佢哋疲于奔命。射手米查利安东尼奥近10仗入得1粒咁大把，而且日前联赛激斗利物浦输0比1，球员体力消耗大，仲有士哥不断嘅查洛保云伤出，真系赔了夫人又折兵。

　　翻查纪录，西维尔近6场欧霸取得5胜1负，包括上圈附加赛淘汰萨格勒布戴拿模，水平稳定，加上各项赛事近5仗主场出击，亦取得4胜1和，今遇残兵「锤仔帮」，西维尔有力先拔头筹。