今日下晝澳職獨腳戲，西悉尼流浪者主場對墨爾本城。墨爾本城早前因多名球員要為澳洲國家隊效力，影響成績，上場各人回歸即大炒對手，今場乘勇出擊作客「西悉」，加上雙方近6次交手，墨爾本城獲4勝2和，推介客勝。

　　西悉尼流浪者唔識入波

　　西悉尼流浪者今季表現令人失望，9戰只得2勝3和4負得9分，目前排聯賽榜第9位。球隊開季成績一般，原因係前線把握能力欠佳，聯賽9戰只入8球，平均都入唔到1粒，近6輪聯賽4次食白果，今場即使有主場之利，亦不宜高估。

　　墨爾本城早前有佔士麥卡倫、馬菲歷基、馬高迪利奧及乾拿麥卡菲為澳洲國家隊踢世盃外，令球隊早排對西部聯嘅榜首大戰輸波，好彩上場各將回歸，作客即贏紐卡素噴射機4比2，當中佔士麥卡倫梅開二度，佢更以7球喺射手榜領先，今場有力再數胡。睇番雙方近6次交手，墨爾本城獲4勝2和佳績，客勝屬不二之選。