年初七「人日」最紧要和和气气，今晚西甲有场独脚戏，由毕尔包主场对爱斯宾奴。虽然毕尔包啱啱喺西杯淘汰皇家马德里，但面对同级球队反而冇乜计；爱斯宾奴首席射手鲁尔杜马斯坐波监，造访「巴斯克雄狮」亦唔敢冒进，双方近年碰头经常不分胜负，不妨直取和波。

　　毕尔包向来遇强愈强，今届西杯16强先击退卫冕嘅巴塞，报番上届决赛一箭之仇，喺上周中8强对住另一班霸皇马，完场前凭后备上阵嘅阿历斯比伦古亚一箭定江山，将呢支联赛1哥淘汰，但相对地耗力不小。毕尔包斗强队特醒，同佢哋防守硬净、反击锐利有关，不过当遇上专注防守嘅同级对手，就未能将最擅长嘅稳守突击尽情发挥，好似早前联赛对住埃拉维斯、基达菲、利云特及ＣＦ格兰纳达等中下游球队，都系和波失分。

　　近4次交锋3打和

　　爱斯宾奴踏入2022年后气势回落，近5仗只得2和3负，其中上仗联赛主场对贝迪斯惨败1比4之余，仲有首席射手鲁尔杜马斯「两黄一红」被逐，今场要坐波监，攻力受削下必先巩固防守，由于佢哋之前已经喺西杯出局，有整整一周准备今仗，体力相对较着数。

　　睇番毕尔包今季踢咗22场联赛，多达10场同对手打和，系暂时和波最多嘅西甲球队。加上两军近4次交锋亦和咗3次，包括首循环各一言和，今仗睇嚟都系和气收场。