周五早上有场世盃外南美洲区关键战，巴拉圭主场斗乌拉圭。乌拉圭接连输波後终於易帅，新帅迪亚高阿朗素首个任务当然系力争世盃入场券，遇上态沉嘅巴拉圭，有力打响头炮重回胜轨，乌拉圭让平半照捧上盘。

　　乌拉圭喺前主帅泰巴尼斯率领下，之前3届世盃都跻身淘汰赛，包括2010年取得殿军，2011年更勇夺美洲国家盃。佢近年身患吉巴氏综合症，要撑住拐杖领军，自然备受尊重，就算今届世盃外战绩飘忽都能保住帅位。可惜乌拉圭喺近4仗世盃外输晒，包括惨吞玻利维亚3蛋，依家跌落第7位，随时无缘世盃，因此无奈将佢炒鱿，换嚟迪亚高阿朗素临危受命。


　　迪亚高阿朗素曾执教帕丘卡及蒙特雷等墨超球队，赢过墨超及中冠盃锦标，以往泰巴尼斯换血不力为人诟病，虽然迪亚高阿朗素都有召入卡云尼、苏亚雷斯及高甸等老将，同时亦有选法根度柏利斯查、达云纽尼斯、法根度托利斯及朗奴阿拿奥祖等新人，实行以老带新，希望有一番新景象。乌拉圭依家落後第4位嘅哥伦比亚1分，外围赛剩番4轮，为打入世盃不容再失。

　　巴拉圭主力缺阵打击大

　　暂排尾2嘅巴拉圭落後哥伦比亚4分，争世盃入场券同样未绝望，可惜中场重心施素奥迪斯及古巴斯因伤退队，对球队影响甚大，何况佢哋近5仗世盃外未赢过，状态唔见得比乌拉圭好。双方近4次碰头，乌拉圭3胜1和未输过，加上新帅效应，有力赢波反弹。