周六凌晨英超獨腳戲有「福特」大戰，由賓福特主場迎戰「大黃蜂」屈福特。今季新昇班嘅賓福特依家排13位，表面算係理想成績，但近況其實極差兼極殘陣；作客嘅屈福特亦唔好得幾多，3連敗後士氣低落，兩隊同樣處於低谷，今場好大機會先踢穩陣波，半場和值得一博。

　　「大黃蜂」近況走曬樣

　　賓福特開季憑充滿斗志嘅體力化踢法，一人走多步拎到唔錯成績，不過呢股「士氣波」難以長時間維持，實力不足嘅弱點好快暴露，而且喺門將大衛拉耶等主力受傷後立即冧檔，近8場聯賽只得1勝，今場仲有王牌前鋒艾雲東尼因日前確診新冠肺炎缺陣，殘陣下肯定會踢得保守。

　　屈福特自聘請雲尼亞里執教後，雖然試過4比1大勝曼聯，但近3場聯賽輸曬兼合共失咗9球，仲有伊斯美拿沙亞等攻擊重心受傷倦勤。翻查兩隊過去3次聯賽交手，3場都係開半場和，今場可以再追。