今午澳職獨腳戲，惠靈頓鳳凰主場迎戰西悉尼流浪者，主隊延續上季尾嘅強勢，今季開咧兩仗1勝1和，將球會嘅連續不敗紀錄增加至13場，教練烏福達雷嘅「先發制人」戰術相當有效，今季喺英格蘭射手加利賀柏回巢後，更得心應手，今仗一於再追鳳凰嘅「第一隊入球」。

　　鳳凰自今年4月初輸波後，立即打出一輪13場不敗走勢，呢支進攻型球隊擅於「先發制人」，對上7場聯賽全部都順利先拔頭籌，烏福達雷希望爭取領先，令呢支年輕球隊可以喺順境波下發揮更高水平，計劃目前相當奏效。鳳凰前鋒加利賀柏回巢後，更能造到一針見血效果，呢位英格蘭前鋒喺頭2場都先開紀錄，表現可靠。

　　「西流」後防欠穩

　　西悉尼流浪者今季有英格蘭中場球星魯迪維爾加盟，不過開咧兩仗都只能夠和波，而且球隊防守並唔穩健，翻查兩隊交手往績，對上9次對碰，鳳凰有8次成功先開紀錄，預料鳳凰乘住近期勇態，可再一次先下手為強第一隊入波。