周六晚澳職尾場，珀斯光輝主場火並阿德萊德聯。上季冇份踢季後賽嘅光輝，今季簽入前曼城及利物浦射手史杜列治，拍住箭頭科拿路利火力大增，「阿聯」有回流新兵佐治布歷活特極速入局，加上兩軍近年碰頭例演入球騷，2.5球嘅入球大更加值博。

　　今季澳職最矚目球星，非史杜列治莫屬。「史獨」今年3月先同土超球隊特拉布宗解約，雖然久疏戰陣，但呢位32歲前英格蘭國腳仍屬當打之年，應付澳職綽綽有餘。除此之外，陣中仲有高大中鋒科拿路利為佢開路，科拿路利近兩季為光輝喺聯賽攻入26粒，拍住「史獨」攻力有增無減。

　　近5次交手旺大盤

　　上季位居第5、並殺入季後賽4強嘅阿德萊德聯，雖有箭頭杜米祖歷轉投FC麥克阿瑟，好彩從英乙球隊購入佐治布歷活特，呢名回巢舊將毋須磨合，喺9月澳足盃32強已經開齋，協助「阿聯」加時贏科列雅典娜3比1，配合新星穆罕默德托尼，火力不容小覷。翻查紀錄，兩軍近5次交手全開3球或以上，其中科拿路利場場有士哥，「阿聯」後衞見到佢都怕怕，2.5球嘅大盤咪錯過。