今晚英超焦点战，「狐狸」李斯特城主场硬撼曼联。李斯特城今季大跌Watt，防守不稳兼伤兵满营，惨成「落水狐」。曼联王牌C朗宝刀未老，加上客场出击特醒，今仗有力反客为主，直取客胜。

　　曼联今场虽有中坚华拉尼同哈利马古尼因伤倦勤，好彩C朗仍然交足货，回巢后6次披甲共入5粒，啱啱过去嘅国际赛期，两次为葡萄牙上阵轰4粒，包括对卢森堡连中三元，唔单止令佢成为国际赛史上第1个10次演帽子戏法嘅球员，亦系其职业生涯第58次「戴帽」，弗到漏油。

　　值得一提嘅系，曼联虽然近况一般，但多属主场赛事，反而客场表现突出，连同上季在内，连续29仗联赛客场未输过，单计近5仗联赛作客更取得4胜1和，造访态沉嘅李斯特城，一定趁机踩多脚。

　　李斯特城伤兵满营

　　另边厢，李斯特城近2季均以第5名过终点，虽然季前捧走小区盾，但开咧后走势持续下滑，头7轮联赛赢得2仗咁大把，欧霸分组赛头2仗亦未赢过，主因系中后场伤兵满营，除咗占士祖斯甸、韦斯利科芬拿因重创长抖外，老将庄尼伊云斯同防中尼迪迪亦不时受伤，新加盟嘅高大中坚维斯达加特表现麻麻，难怪各项赛事近9仗，只得1仗保持清白之身，上轮联赛领先2球大好形势下，仍被水晶宫逼和2比2，令人失望，今仗即使有地利都撑唔落，直取客胜更佳。