世盃外歐洲區E組賽事，捷克周六凌晨主場迎戰韋爾斯，將會係小組次名爭逐嘅關鍵戰役。E組除咗實力超班嘅比利時一枝獨秀外，捷克同韋爾斯實力比另外兩隊白俄羅斯、愛沙尼亞都要高，目前兩隊同得7分，勝負會直接影響附加賽資格，預計雙方會步步為營，開半場和機會高。

　　捷克自歐國盃後狀態回落，上個月3仗除小勝白俄羅斯之外，作客比利時即慘吞3蛋，熱身賽對烏克蘭亦只能夠打和。捷克今場雖然有前鋒柏德列舒希克停賽期滿復出，但球隊向來守強於攻，今年3月作客韋爾斯就喺采取主動踢法下輸0比1，今仗為免再敗，會踢得格外謹慎。

　　巴利缺陣火力銳減

　　韋爾斯亦有王牌加里夫巴利受傷缺陣，雖然仲有熱刺嘅祖朗頓，同列斯聯嘅丹尼爾佔士，但呢位皇家馬德里球星始終係韋爾斯嘅進攻靈魂，冇咗佢直接令本已疲弱嘅鋒力再受打擊。韋爾斯近5場賽事，有4場未能入波，唯一可靠嘅就係唔錯嘅防守，今場作客會以不敗為大前題。翻查兩隊近4次交鋒，全部都開出半場和，值得再追。