世杯外南美洲区赛事，阿根廷主场迎战玻利维亚。阿根廷因有达米安马天尼斯等4名球员违反防疫规定，搞到日前斗巴西被腰斩，4人今仗缺阵，点都有影响，玻利维亚离开高原主场例脚软，客场一定玩死守，初段未必多波入，1.5球半场细捧得过。（周五早上7时30分开赛）

　　阿根廷4名喺英超搵食嘅球员，包括门将达米安马天尼斯、后卫基思甸罗美路、中场贝安迪亚同卢施素，入境巴西后未隔离够14日，由于其中3人未坐完「隔离监」就喺世杯外对巴西正选上阵，开波冇耐即畀当地卫生部官员入场「捉人」，大战变成闹剧搞到要腰斩。

　　玻利维亚作客玩死守

　　虽然逃过被拘留命运，但佢哋所属球会已安排4人飞去克罗地亚隔离10日，以便之后出战英超，不过意味佢哋会错过今场赛事，尤其冇咗首席门神马天尼斯，有指主帅史卡朗尼会起用祖安梅素，佢近两年都冇为阿根廷把关，相信史卡朗尼都唔敢用太过进取嘅踢法，应会先巩固防线。

　　玻利维亚今届世杯外8战只得1胜3和4负，佢哋一向靠高原主场搵食，作客例差，而且过去7次碰头输6次，今仗只求输少当赢，一定玩死守。阿根廷今届世杯外7战获4胜3和，位列次席，今仗遇弱可睇定嚟食，加上「潘帕斯雄鹰」初段唔会去尽，近8仗虽然全部喺上半场领先，但有7次半场开1球，不妨向1.5球半场细埋手。