美職聯周六朝早上演東岸大戰，拿舒維爾主場迎戰紐約城。拿舒維爾主場打高一皮，喪攻唔留手，值得重視，紐約城作客表現唔掂，近5場未贏過，今場係「主場龍斗作客蟲」格局，平手盤拿舒維爾相當好路。

　　現時東岸前列形勢微妙，除咗新英倫革命喺榜首領放，餘下各隊由2至5位球隊積分都喺3分之內，6至9位球隊積分落後唔遠，隨時可以殺上前列，可見東岸前7名嘅季後賽席位爭持相當激烈，拿舒維爾雖然現居東岸第2，但要保住季後賽一席不容松懈，至於排第4嘅紐約城情況相同，要為季後賽繼續搶分。

　　拿舒維爾今季主場13戰7勝6和，平手盤捧佢哋相當穩陣。加上該隊上仗作客2比0擊敗阿特蘭大聯，取得今季作客首場勝仗，連作客都贏，返主場更有把握，雖然部分球員出席國際賽缺陣，但仍有上場入波球員丹尼爾里奧斯及蘭度爾利爾坐鎮，攻力有保證。

　　紐約城作客冇料到

　　紐約城上仗主場2比0擊敗新英倫革命，但一離開主場即變第二隊波，佢哋近5仗作客2和3負，表現走曬樣，遇上主場表現出色嘅拿舒維爾，難望搶分。