今晚F組兩支有份出戰歐國盃決賽周嘅球隊對決，由丹麥主場斗蘇格蘭。丹麥自歐國盃決賽周後進入「後艾歷臣時代」，球隊重新出發，預料經過一段時間，「艾歷臣效應」會逐步減少，相信會踢番最耍家嘅穩守突擊；蘇格蘭入波能力一般，而且兩軍近7次交手，有6次開2球或以下，推介2.5球入球細。

　　講起基思甸艾歷臣，同大家Update佢嘅狀況，呢位中場8月初曾返去國際米蘭訓練營，精神唔錯，不過由於意甲唔批准球員戴心髒起搏器上陣，有傳佢可能會轉投荷甲阿積士。至於事發時及時拯救艾歷臣嘅隊醫、醫療隊伍及隊長卡積亞，日前就獲歐洲足協頒發「主席獎」，表揚佢哋嘅行為。

　　「艾歷臣效應」逐漸消失

　　丹麥今場當然缺少基思甸艾歷臣，同樣地歐國盃時嘅「艾歷臣效應」亦會消失，當時丹麥上下士氣激昂，踢法比平時更進取及具侵略性，唔係平時嗰只穩守突擊，所以當時入波比較多，經過呢兩個月冷靜期，丹麥將回復本來務實嘅面目，相信入波唔會多。

　　蘇格蘭靠歐國聯附加賽先入到歐國盃決賽周，實力同歐洲列強有一定距離，雖然今場有利物浦後衛安德魯羅拔臣壓陣，但佢主要喺鎮守後防減少甩漏，未必幫到進攻幾多，兩軍近7次對賽6次開2球或以下，入球細再追無妨。