今晚意甲尾場，衛冕嘅國際米蘭作客維羅納。國米新兵迪斯高及查漢奴古極速融入，首輪大勝，一掃多名主力離隊嘅懮慮，遇上「私房菜」維羅納，有力乘勝追擊，客勝有計。

　　國米上季事隔11年重奪意甲冠軍，但球季完結後，先有主帥乾地不滿球隊因財困削減投資而離隊，其後再賣走主力阿舒拉夫及射手盧卡古，連同基思甸艾歷臣喺歐國盃爆出心髒有問題，壞消息接踵而至，令人擔心。

　　格食格贏慣維羅納

　　好彩國米新帥施蒙尼恩沙基立即調整戰術，開咧首仗對熱拿亞，以新箭迪斯高作為支點，同以往靠盧卡古超強體能狂爆唔同，迪斯高雖然年紀唔細，但更懂得利用走位同二傳，為隊友制造空位，另一新兵查漢奴古，以及史提芬奴辛斯、尼高路巴列拿等中場伺機入楔，令進攻組織更加流暢，最終憑迪斯高同查漢奴古入球兼助攻大勝4比0，今仗仲有前鋒拿達路馬天尼斯刑滿復出，可以話如虎添翼。

　　另一邊廂，維羅納首輪以2比3輸畀薩斯索羅之餘，仲有中場主力米基爾維洛素做「紅牌阿姑」被逐，今仗要坐波監，可謂賠了夫人又折兵。翻查紀錄，兩軍近6次正面交鋒，國米取得5勝1和，明顯格食格，今仗一定食住個勢再搶W。