今日有場日職獨腳戲，由2哥橫濱水手主場迎戰排第6嘅名古屋鯨魚。兩隊今季成績唔曳，近年交手亦互有勝負，不過論近況水手肯定較佳，佢哋近8場聯賽錄得7勝1和，相當可靠，相比之下鯨魚踢完亞冠盃後跌晒Watt，聯賽兩連敗，水手今仗有埋地利，睇好主勝。

　　現時日職川崎前鋒喺榜首遠遠拋離，水手則排第2。事實上水手今季演出穩定，開季至今僅兩敗，對上一次聯賽輸波要數到5月中不敵鹿角，近8仗聯賽就錄得7勝1和佳績，包括贏過另一前列球隊鳥棲砂岩，更重要係佢哋讓盤遠較前鋒溫和，深受捧場客關注。

　　水手攻擊鐵三角有料到

　　奧運結束後，水手主力前鋒前田大然已歸隊並喺上場後備上陣，配合巴西外援馬高斯祖利亞及剛傷愈嘅荷西艾爾巴，攻力有保證，上述兩位外援喺上仗都有波入，預計呢個攻擊鐵三角今仗繼續嚟料。

　　鯨魚今季成績本來唔曳，不過為應付亞冠盃，已經連續5場聯賽失分，而且僅攻入1球，反映球隊受到雙線作賽影響。佢哋踢完亞冠盃返聯賽兩連敗，上仗淨吞榜末FC橫濱兩蛋尤其令人失望，當中擺烏龍嘅後衞中谷進之介仍然獲意大利籍教練費卡丹迪重用，現時可謂攻不銳、守不穩，今仗作客2哥水手再輸唔奇。