矢志冲冠嘅西甲3哥巴塞隆拿，今晚会作客维拉利尔，巴塞锋线孖宝美斯与基沙文愈来愈夹，为抢分必火力全开，加上近年食住「黄色潜艇」，客胜必捧。

　　巴塞喺上周中西甲快车又大炒基达菲5比2，美斯省两粒之馀，完场前更让出12码畀基沙文操刀，令近两季两人不和传闻一扫而空。美斯今季各项赛事已入33粒，单计联赛就累积25球进帐，亦令佢连续12季于联赛至少攻入25球，坚劲，其拍档基沙文于各项赛事攻入16球，并且分布喺联赛、欧联、西盃及西超盃，单计近6次为巴塞上阵就入咗4粒，弗到漏油。

　　维拉利尔状态略见回落，近3仗联赛两度落败，而佢哋依家最大目标，就係争夺欧霸冠军，换取下届欧联入场券，嚟紧周中于欧霸4强首回合迎战阿仙奴，亦係主帅艾美利首次倒戈旧东家，无论係复仇定係要保住「欧霸专家」嘅金漆招牌，点都重要过今场联赛。翻查纪录，双方近8次联赛碰头，巴塞豪取7胜1和佳绩，摆明格食格，客胜有计。