今晚英超头场利物浦主场迎战「喜鹊」紐卡素。利物浦争前4仲未绝望，上场大意失分，对住差唔多上岸嘅「喜鹊」，必定抢攻博反弹，加上近年主场碰头例速食对手，半场主胜有计。

　　沙迪奥文尼上场终于打破近3个月嘅联赛入球荒，不过「红军」喺尾段被列斯联逼和1比1，目前落后第4位车路士2分，为争取下届欧联入场券，战意肯定较纽卡素高。查实利物浦近5次联赛喺晏菲路迎战「喜鹊」，取得4胜1和之馀，全部上半场已经领先，证明食住对手。

　　纽卡素接近上岸唔硬碰
　　纽卡素近期喺主帅布鲁士多番神调动下，频频抢分成功，近7场联赛取得2胜4和仅1败，包括近两仗击败般尼同韦斯咸，「老布」喺关键时刻换入辛特麦斯明同祖尔韦洛克，都交出入波或助攻，可见去到护级生死关头，战意爆灯。随住接连抢分成功，「喜鹊」依家领先尾3嘅富咸8分，仲要打少一场，就嚟「望见家乡」，之后对富咸及已笃定降班嘅锡菲联两场抢分大战，点都比今场重要，相信唔会嘥力同「红军」硬碰，半场主胜捧得过。