曼联唔急半和

　　首回合领先两粒睇定食向住执教曼联首个锦标进发嘅苏斯克查，今晚带领「红魔鬼」欧霸8强次回合主场迎战CF格兰纳达。曼联首回合作客领先2比0，手执两个作客入球，半隻脚入咗4强，加上佢哋中后场3大战将停赛，返奥脱福唔会同你急。西甲球队CF格兰纳达碍于伤停严重，无力反扑，既然曼联近4场欧霸3次开半场和，不妨再追。曼联上周联赛反胜热刺全取3分，英超前4位置相对稳阵，可以专心喺欧霸发展。佢哋8强首回合作客淨胜CF格兰纳达两球，今场唔出太大意外嘅话，应可顺利杀入4强，同罗马或阿积士胜方争入决赛。「红魔」首回合虽佔得先机，但美中不足嘅係队长哈利马古尼、劳基梳尔及麦汤米尼3名「孭紧簿」球员，上场齐齐攞黄牌，今晚需要停赛，由于艾历拜利染疫未返到英国，后防位置只能「地庄上阵」，域陀连迪路夫及杜安薛比踢中坚，左右两边云比沙卡同阿历士迪尼斯都要顶尽。 格兰纳达残阵更难反扑 CF格兰纳达前中后三线亦有主力受伤及停赛，前锋路尔斯米拿、中场杜明高斯昆拿及基尼均缺阵，上场后备入替但输12码嘅恩伊迪基及后衞杜明高斯杜亚迪亦储够黄牌要停赛，未能派出最佳阵容应战，更难创造奇迹。 相对嚟讲曼联形势上较着数，今场可以睇定嚟踢，苏斯克查大可踢守势波，屯重兵于中场做第一道屏障，除咗费特洛迪古斯同尼曼查马迪外，保罗普巴亦会逗后少少，有机会先策动反击，即使闷和0比0都唔介意，预料上半场战情胶着，而且曼联近4场欧霸开出3次半场和，不妨再追。