澳職周五上演矚目大戰，近期氣勢如虹嘅墨爾本城主場迎戰聯賽2哥西悉尼流浪者。墨爾本城貴為上季亞軍，球隊實力本屬澳職頂尖，經歷頭6場4負嘅災難性開季後，近期連贏5場發揮應有水平，今仗乘勇迎擊踢法慢熱嘅西悉尼流浪者，讓半一捧上盤之外，半場主勝亦值得兼顧。

　　墨爾本城進入狀態後有極高水平演出，上仗迎戰榜首中岸水手，無論氣勢同戰局上都完全壓倒呢支1哥，中岸水手全場射門「零中龍」，墨爾本城最終輕鬆贏2比0，射手佔美麥卡倫攻入近9場個人第11球，腳風順到冇朋友。陣容方面，墨城只有艾登奧尼爾養傷，上輪傷出嘅烏拉圭中場阿祖安隆拿，賽後證實只屬「小兒科」，估計今仗可以繼續披甲，令墨城無論戰力、狀態及士氣均處巔峰。

　　西悉尼流浪者自月初主場吞墨爾本城雙蛋後，近期亦錄得3連勝，不過所贏對手西部聯、威靈頓鳳凰及珀斯光輝，全部都排聯賽榜下半部，級數難與大勇嘅墨爾本城相比。西悉尼流浪者入局較慢，對上8場聯賽上半場只攞到1勝2和5負，今場隨時早段已失守，相反墨城信心爆棚，5連勝全部都喺上半場已領先，今仗除咗捧上盤，半場主勝亦可一試。