C朗挂帅争响头炮

世盃外围赛欧洲区A组赛事，C朗拿度领军嘅葡萄牙，将会喺意大利都灵嘅祖云达斯「主场」迎战阿塞拜疆。赛事搬去都灵为C朗带来唔少方便，悭番啲飞行时间，而葡萄牙作为2016欧国盃及2019欧国联冠军，球队实力同经验都远胜对手，今仗世盃外第1击有力打响头炮，捧让球主胜。

葡萄牙由2002年至今，已经连续5次打入世盃决赛周，今届外围赛抽入A组，同组对手有塞尔维亚、爱尔兰、卢森堡同阿塞拜疆，牌面上葡萄牙係出线大热，争出线主要对手只有塞尔维亚。葡萄牙踢毕今仗对阿塞拜疆之后，嚟紧周日就要作客塞尔维亚，然后再喺下周二作客卢森堡。换句话说，今次国际赛档期最重要就係对塞尔维亚，葡国主帅费兰度山度士今仗全力争胜之馀，亦可考察各将状态，为来仗大战作准备。

鱼腩阿塞拜疆未够班

喺点兵方面，葡萄牙继续以36岁嘅C朗为主，呢位球王今季喺意甲射入23球，包括前仗对卡利亚里大演帽子戏法，上仗对宾尼云图虽然冇入球，但亦製造多次威胁埋门，近况甚佳，佢嘅前线拍档就有祖奥菲历斯、般奴费南迪斯及摩天奴等，后防则有曼城孖宝鲁宾戴亚斯及祖奥简斯路，对住鱼腩阿塞拜疆绝对绰绰有馀。

阿塞拜疆喺欧洲足协档次分类只属第5档次，喺去年欧国联更曾不敌另一鱼腩卢森堡，今仗要喺顶级档次嘅葡萄牙身上爆冷抢分，恐怕机会不大。葡萄牙对弱旅向来唔留手，去年11月友赛曾以7比0大炒安道尔，今场镬气十足，葡萄牙让3球都要「让主」。