今晚英超头场仲有伦敦打吡，富咸主场火併热刺。虽然排联赛下游嘅富咸近况有番起色，但热刺自从复用「大圣爷」加里夫巴利后，火力更上一层楼，而且以往造访富咸例多波入，预计今场会喺一场入球*，捧中位数2.5球嘅大盘更上算。

　　富咸主帅柏加唔单止球员时代效力过热刺，再之前效力车路士期间，正正畀时任执教车仔、依家执教热刺嘅「寸王」摩连奴放弃，所以今次对战，柏加当然唔衰得；首循环交手富咸成功逼和1比1，柏加算係威番铺。虽然富咸近5仗联赛取得2胜3和，一下子狂抢9分，令护级重现曙光，但要留意被击败嘅大部分对手都实力偏弱，唔好睇得富咸咁高。

　　热刺之前一路靠哈利卡尼同孙兴民数胡，冇事就好哋哋，但当是旦一个受伤即死晒火，「寸王」摩连奴想搵替补，惟有同一直唔咬弦嘅加里夫巴利冰释前嫌，「大圣爷」上仗担正即刻省两粒兼交出助攻，协助热刺大炒般尼4比0。

　　呢位威尔斯国脚近4次上阵，攻入4球及贡献3次助攻，配合哈利卡尼、孙兴民同卢卡斯莫拉，新攻击4人组火力全开，Run得咁顺今场唔怕冇波入。

　　作客富咸劲旺入波
　　热刺确係好入得，近6仗狂轰17粒，但佢哋条防线亦唔算稳阵，如果计埋盃赛加时，竟然失咗11球，包括4场作客全开3球或以上，绝对係入得又失得，既然近7次造访富咸，总入球全开3球或以上，今场捧大盘更加稳阵。