今晚英超焦点战，阿仙奴主场硬撼列斯联。阿仙奴贵价中场汤马士柏迪一伤再伤，左闸基兰泰亚尼又未好番，面对进攻大过天嘅列斯联，唔敢轻举妄动，而且近期主场出击初段例慢热，队长奥巴美扬又唔弗，预计上半场和气生财，半场和好路。

　　伤兵成箩稳阵行先

　　阿仙奴经过早前一波连胜反弹后，再度跌Watt，先喺英足盃出局，之后4仗联赛只得1胜1和2负，包括近2仗接连输畀狼队同阿士东维拉。最惨係贵价中场汤马士柏迪再度受伤，而且比想像中严重，似乎又要抖一轮，冇咗呢位加纳悍将坐镇，中场攻守转换嘅速率一定受削，而膝头有伤嘅基兰泰亚尼仍未复操，焗用薛迪索拉斯客串左闸，效果麻麻。队长奥巴美扬自处理好家事归队后，连续2仗后备入替犹如梦游，攻力大减，幸好门神宾特尼奴同中坚大衞雷斯刑满复出，另一后衞柏保路马尼亦可候命，相信主帅阿迪达会稳阵行先。

　　列斯联喺「狂人教头」比尔沙执教后，贯彻有前冇后、打死罢就嘅作风，箭头班福特近3仗入2粒，重拾射门鞋。不过列斯联依家伤兵满营，包括罗宾高治、迪亚高洛兰迪、科梳、加云菲腊斯等主力，影响不小，其中冇咗中场指挥官加云菲腊斯，令组织能力受削，难怪各项赛事近7仗只入8粒，进攻确係冇季初咁锐利。不过阿仙奴主场战绩一般，近4仗主场只得1胜3和，3仗和波全部交白卷，而且入局太慢，4仗全开半场和，预计初段都会陷于胶着，半场和不妨追多铺。