今晚西甲独脚戏，贝迪斯主场迎战奥沙辛拿。贝迪斯中场简拿利斯（图左）近况弗爆士哥停不了，39岁嘅祖亚昆亦屡有神来之笔，令球队从谷底反弹，加上佢哋对赛往绩食住对手，主胜绝对係明智之选。

　　贝迪斯开咧头11场输7场，令「智利工程师」比历连尼帅位不稳，好彩佢哋喺一众伤兵康复后渐入佳境。踏入2021年，贝迪斯打咗7场获4胜3和，包括打和同市死敌西维尔，喺联赛杀番上中游。贝迪斯近两仗接连喺联赛同盃赛两斗皇家苏斯达，先係联赛落后两球劣势下，靠后备入替嘅祖亚昆助攻兼入波，末段连追两粒打和；去到上周中西盃16强，又係先落后下法定时间追平，到加时靠保查艾利斯亚斯连省两粒，反胜3比1晋级，埋斋嗰球亦係来自祖亚昆嘅助攻，可谓老而弥坚，而攻入扳平士哥嘅简拿利斯，近7次披甲入8粒，脚风坚顺。

　　奥沙辛拿伤兵满营

　　另一边厢，下游分子奥沙辛拿伤兵满营，包括阿利丹尼、祖尼、巴沙历及阿祖安卢比斯等人，虽然右闸拿祖维度坐完波监，又轮到另一后衞朗卡尼亚要停赛，佢哋日前喺西盃16强斗到互射12码被乙组仔艾美利亚淘汰，身心俱疲。何况双方近6次交锋，贝迪斯获5胜1和，摆明格食格，主胜捧得过。